ए  हवा ! जनि तू हमरा के डोलावSS |

 मत छुवS तू देह, धोती मत हिलावSS |

आज हम संसार से परेशान बानी

 सुत गईल बा दर्द ओहिके मत जगावSS |

 प्रीत कईनी हम जहाँ :घात मिलल

 पीठ पर ना हाथ मिलल : लात मिलल

 दुश्मनों  से घटिया  रिश्ता - नात मिलल

 मत तू हमके प्रेम से “आपन” बोलावSS |

 ए हवा, जनि छुवS तू देह धोती मत हिलावSS |

 जे सटल लगे :आपन लाभ खातिर

 हं-में-हं कईल, अपना स्वार्थ खातिर

गरज पडला पर भईल  कबो ना हाज़िर

 मत तुहु एतना अब नजदीक आवSS |

 ए हवा, जनि छुवS तू देह धोती मत हिलावSS

 मन ह कुकुरपोंछी : ई ना  सुधरिहैं

भले आग में ई फतिंगा जरि के मरिहैं

फेनु से ई प्रीत करिहैं : फेनु से उफर परिहैं

देह के छूवलुS त अब जियरा में आवSS |

ए हवा,जनि छुवS तू देह धोती मत हिलावSS |